1. Чанга хөгжим, архины үнэр толгой эргүүлнэ. Тэр хааччихсан юм бол? Ахиллес Валенсиан...

Бүжиглэж байгаа олны дундуур зүсэн гарч тагтан дээр очсон ч тэр байсангүй. Санаа алдан, толгой гудайлгасаар өрөө рүүгээ буцахаар эргэв. Гэтэл гэнэт нэг жигтэй чимээ тагтны харанхуй хэсгээс сонсогдлоо... Сониуч зан хөдлөн чимээ гарсан зүг рүү дөхтөл харсан зүйлдээ итгэж ядан амьсгаа боогдох шиг болж, гар минь чичирч эхлэв. Ахиллес Тэссийн бэлхүүсээр тэврэн, Тэсс харин нэг гараа хүзүүгээр нь ороон, нөгөө гараа үсэнд нь шигтгэн шунахайран үнсэлцэж байлаа. Тэдний хооронд зүү ч орох зай байхгүй бололтой. Тааламжтай гинших гиншилт бүр нь зүрхийг минь хэдэн мянган хутгаар хэдэн сая хэсэг болгон сийчих шиг болно. Өөрийн эрхгүй арагш аажуухан ухарч, нүднээс минь нулимс эзэнгүй мэт урсаж эхлэв. Ахиллесын гар түүнийг өөртөө гүн шингээх гэсэн мэт базан татаж байхыг хараад дуу алдахгүйг хичээн амаа даран эргэж гүйлээ. Өрөөндөө орох хүртэл зогссонгүй. Хаалгаа хааж аваад тэсэхүйеэ бэрх өвдөх цээжээ тэврэн чангаар цурхиран уйллаа. Тас тэврэлдэн үнсэлцэж байгаа тэдний дүр нүдэнд дахин дахин харагдаж улам ч их шаналгаж байлаа. Намайг Ахиллест сэтгэлээ илчлэх гэж байсныг Тэсс мэдэж байсан. Тэр яаж чадав аа... Хүйтэн шалан дээр шөнөжин хэвтэж, анхны хайраа алдсандаа гаслан шаналж буй зүрхээ тэвэрч хонов. Төрсөн эгч минь миний хайрыг үгүй хийчихлээ... Эндээс явъя, дахиж ирэхгүйгээр явъя.

7 жилийн дараа:

Бүтэн 7 жилийг гэр бүлийнхнээсээ, Ахиллес Валенсианаас хол, хэл чимээгүй өнгөрүүлсний эцэст дахин Калифорнид хөл тавьлаа. 

Ээж байн байн хаалга руу ширтэж эгчийг ирэхийг байж ядан хүлээж байв. Уг нь түүнд өнөө оройн зоогны талаар хэлсэн боловч Тэссд үргэлж гэр бүлийнхнээс нь илүү чухал асуудал байдаг юм болохоор өдий болтол ирээгүй л байв. Би алимтай бялуунаас халбагадан ам руугаа хийхийн даваан дээр өндөр өсгийтийн тог тог хийх чимээ гарч

-Бүгд сайн уу? Надад та нарт хэлэх зүйл байна гэх Тэссийн ялдам хоолой сонсогдлоо. Шар өнгийн намирсан даашинз, өндөр өсгийт, мөрөө шүргэсэн өтгөн хүрэн үс, төгс нүүр будалт-тэр урьд урьдынхаас ч улам үзэсгэлэнтэй, болц нь гүйцсэн жимс шиг харагдаж байлаа.

-Хээе, бяцхан дүү минь гээд миний хацар дээр хөнгөхөн үнсээд хажуугийн сандал дээр сууж

-Ямар том болоо вэ? Хамгийн сүүлд уулзсанаас хойш бүр ч хөөрхөн болчхож гэлээ. Би дадал болсон найрсаг инээмсэглэлээ тодруулаад

-Баярлалаа. Та ямархуу байв даа?

-Би сайн. Үнэндээ сайнаас ч илүү гэж инээд алдав. 

Оройн зоог өндөрлөж, бүгд амттан идэж байхад Тэсс

-Ингэхэд Эмм, чи маргааш болох үдэшлэгний талаар сонссож амжсан уу? гэж асуухыг сонсоод ээжийн царай тавгүй болж ирэв.

-Юун үдэшлэг билээ?

-Чи мэдээгүй байгаа байх нээ. Валенсианыхны гэрт болох үдэшлэг!

Энэ удаа миний царай тавгүй болох ээлж ирэв. Тэсс үргэлжлүүлэн

-Валенсиан корпорац Форбес сэтгүүлийн хамгийн амжилттай яваа компаниар шалгарсны баярыг тэмдэглэх гэж байгаа юм. Тэд одоо бизнесийн ертөнцийг байлдан дагуулж байна. Гайхалтай биш гэж үү?

Би хоолой засаад аль болох хэнэггүй царайлахыг хичээж зүгээр л толгой дохилоо. Аав:

-Тийм ээ, Ахиллес энэ бүхний төлөө үнэхээр шаргуу ажилласан шүү. Аавыгаа өнгөрсний дараа ганцаараа зүтгэсэн дээ гэж ихэд бахдангуй өгүүллээ. Тэсс:

-Тэр миний хамгийн сайн найз гэдэг нь бүр ч сайн хэрэг гэхэд миний нүдэнд 7 жилийн өмнөх дүр зураг үзэгдэн, гартаа барьсан хундагаа бүр ч чанга атгав. Тэсс:

-Бас энэ үдэшлэг дээр би нэгэн маш чухал зүйлийг зарлах болно. Тэгэхээр та нар бүгд очих ёстой шүү! гэхийг сонсоод би татгалзах санаатай ам ангайтал ээж урьтаж:

-Наад шинэ бөгжтэй чинь холбоотой юу? гэхэд Тэсс ичингүйрсэн царай гарган, гараа бүх хүнд харагдахаар өргөн эргүүлж

-Тэр өчигдөр надад санал тавьсан. Маргааш бид албан ёсоор сүй тавьснаа зарлах болно гэлээ. Бүгд балмагдсандаа эрүү нь мултрах шахаж байхад миний хэвлий дотор могой атиралдах шиг болов. Ээж гайхсанаа нуусангүй,

-Хөөх, хэзээ ийм төвшинд хүрчих вээ, та хоёрыг ийм нухацтай хандаж байгаа гэж бодсонгүй шүү гэж уулга алдав.

-Тийм ээ, бидний хооронд олон асуудал байсан нь үнэн. Гэхдээ тэр гэр бүлдээ тохиолдсон хүндхэн явдлыг давж гарч, эцэст нь надтай гэрлэхээр шийдсэнд би үнэхээр баяртай байна гээд Тэссийн нүдэнд баярын нулимс цийлгэнэлээ. Би түүний бөгжин дээрх хоёр үсгийг хараад харцаа салгаж чадалгүй, хундагаа тас атгасан чигээр

-“В” үсэг нь ямар учиртай юм бэ? гэхэд

-Валенсианы В. Гайхалтай байгаа биз? гээд Тэсс бахдалтай нь аргагүй инээмсэглэлээ.

Номын нэр: Хайрын урхи

Та зохиолоо үргэлжлүүлэн унших бол Эндээс авна уу